ابو عبیدہ کا خواب
جس وقت صحابہ کرام کا لشکر ملک شام کے فتح کرنے میں مشغول تھا اور دمشق فتح کرنے کا منصوبہ درپیش تھا مگر دمشق کے فتح کرنے میں کسی قدر دقتیں پیش آرہی تھیں اور صحابہ کرام کو ایک قسم کا تردد لاحق تھا۔
ایسی حیرانی کے وقت حضرت ابو عبیدہ رضی اللہ عنہ نے خواب دیکھا: کہ میرے خیمہ میں حضور صلی اللہ علیہ وسلم تشریف لائے اور ابو عبیدہ کو بشارت دی کہ اے ابو عبیدہ! مسلمانوں سے کہہ دو کہ آج یہ مقام فتح ہو جائے گا اطمینان رکھو یہ فرما کر حضور نے بہت جلد واپسی کا عزم فرمایا۔
حضرت ابو عبیدہ نے عرض کیا: یا رسول اللہ! اس وقت حضور کو جلدی اتنی کیوں ہے فرمایا: اے ابو عبیدہ! آج ابوبکر کی وفات ہو گئی ہے میں ان کا جنازہ تیار چھوڑ کر آیا ہوں مجھے ابھی ابوبکر کے جنازہ پر واپس جانا ہے یہ فرما کر حضور فورا واپس تشریف لے گئے۔
(سیرت الصالحین)
سبق
حضور صلی اللہ علیہ وسلم کو حضرت صدیق اکبر رضی اللہ عنہ سے ایک خاص تعلق تھا اور حضور کے یہاں بھی اور وہاں بھی صدیق اکبر پر ایک خاص نظر رحمت رہی ہے۔
